مفاجأة| القايمة سقطت بالفعل.. وهذا ما يفعله العرسان عند التقدم للزواج
رأثار منشور لحساب فتاة على «فيسبوك»، حالة من الجدل، خاصة أنه يتعلق بـ قائمة المنقولات التي بات يرفض معظم الشباب المقبلين على الزواج التوقيع عليها.
«هاتجنن يا جماعة، أنا عايز أعرف إيه اللي حصل للعرسان، أنا وأختي اتقدم لنا في الفترة دي 6 عرسان كلهم مفيش فيهم غلطة، لكن وقت الاتفاق كلهم قالوا كلام واحد؛
انهم هايفرشوا الشقة لوحدهم، وإحنا اللي نختار كل حاجة، وهايدفعوا مهر ومش هايمضوا قايمة، طبعا أهلي استغربوا ورفضوا الكلام ده، ولما لقينا انه كله بيقول نفس الكلام قلنا خلاص لو اللي جاي بعد كده قال الكلام ده هانوافق».
وأضافت: «وفعلا آخر واحد جه قال نفس الكلام، ووافقنا وكله بقى تمام، المهم لما اتعزمنا عندهم، جت سيرة العادات القديمة اللي كانوا بيتجوزوا عليها الاول،
وان في رجالة كانوا بيكتبوا الشقة باسم مراتتهم، كنوع من الهدية، فبابا قال للعريس بدل القايمة اكتبلها الشقة، راح العريس أول كلمة قال نورتونا مع الف سلامة،
وطردنا، أنا عايزة أفهم هو ده طبيعي ولا الشباب حصلهم حاجة في مخهم، عشان أنا هاتجنن دلوقتي».
جدل على السوشيال ميديا
سادت حالة من الجدل، الممزوج بالانتقاد للمنشور، حيث هاجم الشباب كاتبة المنشور وأهلها بقسوة، متهمين الأهل بالطمع.
وكتب أحد المتابعين: «مش عارف مين مفهم الناس دي إن القايمة هي الضمان، طيب ما بيتجوزوا بـ قائمة وفي الاخر ربنا بيكرمهم بناس ما عندهاش دين ولا أصل؛ وبيتمنوا بس يتفكوا منهم، وكل واحدة بترجع بيت والدها بطفل واتنين يبهدلوهم معاهم
، شرع الله هو الضمان لمن كان له قلب».
وكتب آخر: «الفكرة انه هو اللي مجهز كل حاجة، وهيديها مهر منفصل، يبقي شرعا ملهاش قائمة، لأنها لا شاركت في العفش ولا اتحسب اللي هايجيبه من مهرها،
بس كدة»، فيما كتب ثالث: «الشباب اللي حصل لهم حاجة والا أنتم اللي كلكم جشع وطمع وعالم نتنه وجعانة، وواخدين الموضوع سبوبة».
كانت بداية تراجع الشباب عن فكرة التوقيع على القائمة، بدأت مع منشور بعنوان “القايمة سقطت في مصر”؛ كتبه إسلام عبد المقصود، الأستاذ بكلية الهندسة جامعة الإسكندرية، مؤكدا أنه اعتاد على المزاح مع طلابه دائما باستخدام فكرة السقوط «الرسوب في الامتحان الدراسي».
وأضاف عبدالمقصود في تصريحات صحفية: «حين أثير الحديث عن فكرة القائمة في الزواج، كنت ممن يرفضون هذا الأمر، لكني فضلت التعليق عليه بشكل ساخر، فعلقت على هذه القضية المثارة بمنشور كتبت فيه “ألف مبروك للرجالة القائمة سقطت في مصر”، فانتشرت هذه المزحة بشكل كبير».
